قارىمدى قالامگەر, اقمىلتىق جۋرناليست مالىك مۇقانوۆ ءومىرىنىڭ سوڭعى جىلدارىنا دەيىن رەسپۋبليكالىق «ەگەمەن قازاقستاننىڭ» وبلىستاعى مەنشىكتى ءتىلشىسى قىزمەتىن اتقاردى.
ءسابيت مۇقانوۆ اتىنداعى وبلىستىق عىلىمي-امبەباپ كىتاپحانادا مارقۇمنىڭ 75 جىلدىعىنا ورايلاستىرىلىپ وتكەن ەسكە الۋ كەشىنە جينالعاندار ۇلت قايراتكەرىنىڭ ماعىنالى عۇمىرى, شىعارماشىلىق مۇراسى, ءور مىنەزى تۋرالى اسەرلى اڭگىمە ءوربىتتى. زيالى قاۋىم وكىلدەرى, بىرگە قىزمەت اتقارعان ارىپتەستەرى, ۇستازدار مەن جاستار الدىمەن “ۇلتىن سۇيگەن قايراتكەر” دەگەن اتاۋمەن ۇيىمداستىرىلعان كىتاپ كورمەسىن تاماشالاپ, ماكەڭنىڭ تۋىندىلارىمەن, شىعارماشىلىق لابوراتورياسىمەن تانىستى.
“قىزىلجار-اقپارات” جاۋاپكەرشىلىگى شەكتەۋلى سەرىكتەستىگىنىڭ ديرەكتورى جاراسباي سۇلەيمەنوۆ قالامگەردىڭ بىرقاتار قاسيەتتەرىنە توقتالىپ ءوتتى.
«قايسارلىعى, باتىرلىعى ەرەكشە ءتانتى ەتەتىن.قازىرگى جاس ۇرپاق ماكەڭدەردىڭ ۇلگىسىندە تاربيەلەنسە, ەلىنە دەگەن سۇيىسپەنشىلىگى جوعارى, وتان ءۇشىن كەۋدەسىن وققا توسەي الاتىن جاستاردىڭ قاتارى كوبەيەرى ءسوزسىز» , دەدى جاراسباي قابدوللا ۇلى.
وبلىستىڭ قۇرمەتتى ازاماتى بولات ساعىندىقوۆ مالىك مۇقانوۆتىڭ اكەسى جاقىپتىڭ وتكەن عاسىرداعى ساياسي قۋعىن-سۇرگىن جىلدارىندا اكە-شەشەسىنە قول ۇشىن بەرگەن قامقورلىعىن, ەرلىگىن ايتىپ, قالامگەردىڭ ۇلتتىق مۇددە, ەلدىك ماقسات جولىندا اتقارعان قىرۋار جۇمىستارىنا توقتالدى.
وبلىستىق “لەنين تۋى”, رەسپۋبليكالىق «حالىق كەڭەسى»,“ەگەمەن قازاقستان” گازەتتەرىندە قىزمەت ىستەگەن جىلدارى كوپتەگەن ءتۇيىندى ماسەلەلەرگە قالام تارتىپ, اركەز حالىق قامىن ءبىرىنشى ورىنعا قويىپ ءجۇردى. ارداگەر جۋرناليست نۇرسايىن ءشارىپ مالىك مۇقانوۆتى كوپشىلىك ءتىل جاناشىرى رەتىندە دە تانيتىنىن, وبلىس ورتالىعىنداعى №6 مەكتەپكە قوجابەرگەن جىراۋ ەسىمىنىڭ بەرىلۋىنە دە كوپ ەڭبەك سىڭىرگەنىن ايتسا, جەكە كاسىپكەر بالدىرعان ءىلياسوۆ نىساندارعا ەسىمىن بەرۋ ماسەلەسىن كوتەردى.
اعامىزدىڭ وشاعىن وشىرمەي, ۇرپاقتارىن قاناتتىعا قاقتىرماي ونەگەسىمەن ۇيىتىپ وتىرعان جارى ءاديا احمەتوۆا جينالعان جۇرتشىلىققا العىسىن جەتكىزدى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى